في ڤلبي عندي غنايـة ☆☆☆ خفت نغيب و ينســـوها
ناديت أصحابي و رفڤايا ☆☆☆ نتلموا اليوم نغنـــوها
*
حبـيت نغنـي لاولادي ☆☆☆ الناس اللــي يحبونــي
لخصومي و اللي من غــادي ☆☆☆ البعض اللــي ضامونــي
لرفاق حياتي لنــــدادي ☆☆☆ اللي وقفوا و هــزونــي
لحبابي لاخواتي العشــرة ☆☆☆ لرشيد و لشيخ الدشــرة
الصادق و الحزڤي بالنظـرة ☆☆☆ براهيم و بابي بالذكـــرى
للهش ومحمد و لخضــراء ☆☆☆ لاحمد اللي في عـــيوني
لعرجون الرشتي للبسرة ☆☆☆ لبراد التـاي و للكســــــرة
نغني المحبة و العشرة ☆☆☆ اللــي بيها غطونـــــــي
*
في ڤلبي عندي غنايـة ☆☆☆ خفت نغيب و ينســوها
ناديت أصحابي و رفڤايا ☆☆☆ نتلموا اليوم نغنـــــوها
*
حبيت نغنــــي في لهفــة ☆☆☆ عل الماضي و اللي مازال
عل التركة و الا عل الولفة ☆☆☆ عالجرح الدامــي سيال
على اعوام الدمار الحـرفة ☆☆☆ تخطفت منا نسـاء و رجال
خنقتني الشهقة و العبرة ☆☆☆ و بكفوفي طفيــت الجمرة
و العاشڨ يا ڤلة صبره ☆☆☆ نا عشڤت و خــلونـــي
نا دايا في لون الخمرة ☆☆☆ سكنت في مكنونـــي
عمهوجة سميتها الخضـراء ☆☆☆ حازوها و حــبسونـي
*
في ڤلبي عندي غنايــة ☆☆☆ خفت نغيب و ينسوهــا
ناديت أصحابي و رفڤايا ☆☆☆ نتلموا اليوم نغنــوهــا
*
حبيت نغنـــــي بالهمسـة ☆☆☆ على وطني اللي بيه نلاجي
عالجدي و لحڤوه الخمســة ☆☆☆ "و ملك الموت يراجـــــــي"
عل العلم اللي يجلي النكسة ☆☆☆ واللي بيه علاجـــــــــــــــي
شعر و فن و ضو الڤمــــرة ☆☆☆ عالجنة على النار الحمـراء
على خلاصك و خلاص الخضراء ☆☆☆ على همومك و محونـي
عالدنيا و ما فيها يجـرى ☆☆☆ على الباهي و الدونــي
*
في ڤلبي عندي غنايــة ☆☆☆ خفت نغيب و ينسوهــا
ناديت أصحابي و رفڤايا ☆☆☆ نتلموا اليوم نغنـــوهــا
*
حبيت نغني بالرنــة ☆☆☆ نجيب مهاوي بلادي
عبيدي و قبلاوي ما بنه ☆☆☆ مثلوثـــي و عــبادي
موڤف عرضاوي بالغنـة ☆☆☆ كي صب الرشــراش
"مرحوم اللي سمى عيشـة ☆☆☆ صادق ما يخطــــاش"
يا عيشة بلا بيك العيشـة ☆☆☆ مـرة ما تحـــــــلاش
و من كيفي سنداته عيشـة ☆☆☆ حي و ما يفنــــــــاش
*
في ڤلبي عندي غنايــــة ☆☆☆ خفت نغيب و ينسـوهـــــا
ناديت أصحابي و رفڤايــا ☆☆☆ نتلموا اليوم نغـــــــنوهــا
*
حبيت نحكــــــي لاولادي ☆☆☆ لحبابي تلموا في غيابـي
كونوا كيف الطير الشـادي ☆☆☆ غـــــــــنوا للحريـــــــة
وطني مهما عاش مهــانـه ☆☆☆ نهار يشعشــــــع ضيــــه
ينور و تزغرد نسوانـة ☆☆☆ و تنهار حيوط الزنزانة
و ترفرف روحي في سماكم ☆☆☆ و البسمة تملى عينيــــة
*
في ذاتي سكنت غنايـــــة ☆☆☆ ڤلبـــي بيــــها مولّـــــع
كبرت في جاشي في حشايا ☆☆☆ ما حبت تــتــــڤلــــع
نغنيها أنا و رفقايـــــا ☆☆☆ نهزوا الصوت يشــرڤع
القصيدة هاذي كتبتها بمناسبة أربيعينية الفقيد نور الدين بن خذر اللي كان وجه من الوجوه البارزة لليسار التونسي كيف ما كان من أنشط العاملين في حركة الثقافة و النشر في بلادنا .
تم تلحينها من طرف جمال قلة و خميس البحري و تغنـّات في حفل الأربعينية .
للذكرى و الذاكرة و الاستذكار
